Mot de la sendi

 

Cars ami Felibre,

Dóumaci vosto fisançouso aprouvacioun que me pourtè i’a gaire à la tèsto de la Mantenènço de Prouvènço, m’avès permés de viéure un moumen estraourdinàri. Es aqui un grand ounour que me faguerias, en me dounant l’escasènço d’adurre ma pichoto pèiro à la mount-joio felibrenco.

Vole d’en proumié me presenta, pèr aquéli que me counèisson pas.

Siéu Arlatenco, lou sabès. En 1996, fuguère elegido rèino d’Arle e, tres annado de tèms, ai representa ma vilo e lou terraire arlaten en Prouvènço, de-longo emé moun diadèmo de velout sus la tèsto… Ai buta à la rodo dins touto meno d’acioun, sèmpre mougudo pèr l’amour de la lengo nostro e moun afougamen pèr lou terraire. À vinto-cinq an, me siéu engajado emé li gènt de bouvino dins l’Antico Counfrarié di Gardian de Sant-Jorge, e dins la Nacioun Gardiano. Ai pièi oubra dins de group de tradicioun pèr douna de cous de broudarié e de courduro e trasmetre i chato l’art dóu coustume d’Arle.

E subre-tout siéu rintrado emé fierta dins lou Felibrige en 1998. Vuei, après tant d’annado d’envestimen en païs d’Arle, vole servi lou Felibrige prouvençau, lou vole servi primamen, sus touto soun espandido.

Travaie dins la founcioun publico ounte siéu cadre, especialisado dins lis afaire generau, à l’agloumeracioun d’Arle, Camargo, Mountagneto e Crau. En mai de moun mestié, siéu manadiero de biòu e de chivau Camargo emé moun espous e mi tres drole.

Aro que me couneissès un pau miés, vèn pèr iéu lou moumen de gramacia moun davancié Guy Revest pèr sa fisanço, e de ié faire la capelado pèr soun engajamen emai pèr tout lou travai coumpli que i’a permés d’enaussa lou raiounamen de la Mantenènço de Prouvènço.

Vole gramacia tambèn gènto Rousselino Martano, tant devouado, que m’a proumés d’ajuda lou burèu nouvelàri. Gramaci peréu à-n-Alan Guiony, lou clavaire, pèr lou travai coumpli e pèr sa dispounibleta à countinua soun obro à moun coustat.

Lou burèu a chanja. Dono Roulando Falleri, sucedis à nosto caro Rousselino Martano au poste de secretario. Fasèn de mai acuiènço à-n-uno nouvello souto-sendi, pèr lou Var levantés, Dono Marìo-Franço Guigoni. Ié souvète la bèn-vengudo en tóuti dos.

Vole dire mi gramaci en tóuti li souto-sendi pèr soun ajudo preciouso e ié faire assaupre que sarai pas en chancello pèr m’apiela sus éli.

Mancarai pas de vous assabenta de l’ourganisacioun à veni après lou proumié acamp dóu burèu mantenenciau.

De l’Uba mountagnòu à la mar bluiejanto, di terro palunenco à l’entour dóu coustat de Rose, à la bello dóu miejour.  La Prouvènço escarrabihado fai mirando souto la capo dóu soulèu, avèn un tresor inestimable qu’en tóuti fai lingueto.

Terro di gràndis obro literàri, lume di pintre ufanous, Prouvènço pòu èstre fièro de soun patrimòni.

Pamens, apara e ilustra la culturo nostro es tambèn e subre-tout uno lucho de cade jour, sènso relàmbi !

Es lou biais de viéure de chascun dins sa vido-vidanto e chascun lou laisso en eiretage i generacioun venènto.

Es la maire que mostro à si chatouno soun biais poulidet de carga lou vèsti, es lou paire que fai counèisse à soun drole coume touca lou tambourin, es li grand que conton à si felen, en prouvençau d’istòri meravihouso.

Acò’s un biais impourtant pèr se ramenta de nòsti racino ! Nòsti racino soun nosto identita. Qunto es l’aveni d’un pople sènso identita ?

Ami Felibre, avèn lou mume ideau, lou mume estrambord, lou mume amour pèr nosto Terro de Prouvènço.

Sian dounc de la memo famiho ! Es pèr acò que vous demande de countinua d’éstre liga, uni pèr faire avans, ensèn.

 

Cars ami Felibre, sigués segur que farai moun proun pèr faire bono obro e apara em’estrambord la causo felibrenco en pourtant aut li coulour de Prouvènço.

 

Dóu bon dóu cor vous dise, pèr la Glòri dóu Felibrige e pèr l’ounour de nosto lengo :

Osco e longo-mai !

 

   

Agenda

< 2021 >
octobre 03 - octobre 09
  • 03
    Aucun événement
  • 04
    Aucun événement
  • 05
    Aucun événement
  • 06
    Aucun événement
  • 07
    Aucun événement
  • 08
    Aucun événement
  • 09
    Aucun événement
© Le Felibrige Tous Droits réservés | Réalisation Dream Media® 2016 - Mentions légales et crédits